A gastronomía e o viño reivindícanse en Xantar como dinamizadores da contorna rural

O salón acolleu ao longo de toda a xornada a celebración da semifinal dos Concursos “Cociñeiro do Ano” e “Camareiro do Ano”

Os expositores reuníronse cunha ducia de axencias de viaxes especializadas en turismo gastronómico de España, Portugal e Noruega

Celebrouse tamén o XVI Encontro Internacional de confrarías que reuniu a 40 entidades de España, Portugal e Francia

Ourense, 06/02/2020.- O rural reivindica o seu espazo en Xantar, tanto por ser o provedor dos produtos autóctonos como por ser o que ofrece un tipo de turismo diferente, desestacionalizado e de calidade. Este foi o fío condutor do acto central da segunda xornada do salón presidido pola delegada territorial da Xunta de Galicia, Marisol Díaz, e no que os alcaldes de Parada de Sil e de Viana do Bolo, que tiñan o día dedicado fixeron un chamamento á volta ao rural para valorar todo o que che ten que ofrecer.

Tamén hoxe foi o día dedicado á Cámara Municipal de Vila Real, cidade portuguesa irmá coa de Ourense que participa en Xantar desde a primeira edición; e da Cámara de Vila Nova de Famalicao que regresa ao salón con forza tras varios anos de ausencia nel.

Xantar é tamén o lugar elixido para a presentación de destinos únicos #ante profesionais do turismo e medios de comunicación de distintas partes de España e Portugal. Leste foi o caso do INORDE que aproveitou a súa participación no salón para presentar o Xeodestino “Terras de Celanova – Serra do Xurés”. A presentación correu a cargo do presidente do INORDE, Rosendo Fernández, que estivo arroupado por boa parte dos alcaldes dos 14 concellos que integran este novo xeodestino que aúna a oferta de turismo cultural, termal e de natureza das comarcas da Terra de Celanova e da Baixa Limia.

E como xa é costume desde hai 16 anos, o xoves de Xantar é o día dedicado ás Confrarías Gastronómicas e Enófilas, estas sociedades gastronómicas realizan un importante labor no referente á recuperación de produtos e pratos tradicionais; á edición de libros, catálogos e receitarios sobre produtos autóctonos; así como á súa gran contribución á conservación da cultura e a tradición gastronómica de vilas e cidades. Neste 16º encontro participaron máis de 40 confrarías procedentes de España, Portugal e Francia.

NEGOCIO

Hoxe tamén se celebrou o IV Workshop de Turismo Gastronómico de Xantar que reuniu en Expourense a 12 axencias de viaxes especializadas en turismo e gastronomía de España, Noruega e Portugal con representantes de turismo dos destinos presentes en feira. En total celebráronse máis de 300 citas de negocio.

Esta segunda xornada de Xantar 20120 continuou cun intenso programa de actividades no que as tres aulas gastronómicas, nas que participan chefs de 6 países e a aula de cata estiveron ao completo ao longo de toda a xornada. Entre as celebradas hoxe destacou o taller para escolares sobre os sabores do mar organizado por ANFACO- CECOPESCA organizado pola Consellería do Mar.

Durante toda esta segunda xornada celebrouse tamén a cuarta e últimas seminifnale do VIII Concurso Cociñeiro do Ano e do IV Concurso Camareiro do Ano. Oito cociñeiros e cinco camareiros de Galicia, Asturias, Cantabria, Euskadi, A Rioxa e Navarra competiron por alcanzar a final nacional que se celebrará en abril de 2020, na Feira Alimentaria en Barcelona. A entrega de premios será esta tarde ás 19.30 h. Entre o xurado destaca a presenza da mestra pasteleira Betina Montagne, xurado do programa “ Bake off”; o crítico gastronómico Carlos Capel; o subcampión da primeira edición deste concurso, o chef Flavio Morganti; ou os membros da Asociación Cociña Ourense, Miguel González e Marco Varela.

Síguenos